काठमाडौं– बेलायती पप गायिका दुआ लिपाले दक्षिण कोरियाली कम्पनी सामसङ इलेक्ट्रोनिक्सविरुद्ध १ करोड ५० लाख अमेरिकी डलर क्षतिपूर्ति माग गर्दै मुद्दा दायर गरेकी छन् ।

अमेरिकाको क्यालिफोर्नियास्थित जिल्ला अदालतमा शुक्रबार दायर गरिएको मुद्दामा सामसङले आफ्ना विभिन्न टेलिभिजन मोडलको प्याकेजिङमा दुआ लिपाको तस्बिर अनुमतिबिना प्रयोग गरेको आरोप लगाइएको छ । लिपाको कानुनी टोलीका अनुसार उक्त तस्बिर कम्पनीले उत्पादनको प्रचार र बिक्री बढाउन प्रयोग गरेको हो ।

मुद्दामा कपिराइट उल्लङ्घन, ट्रेडमार्क उल्लङ्घन तथा कलाकारको छवि र पहिचानको दुरुपयोग गरिएको दाबी गरिएको छ । कानुनी कागजातअनुसार विवादित तस्बिर सन् २०२४ मा अस्टिन सिटी लिमिट्स संगीत महोत्सवमा गरिएको प्रस्तुति क्रममा खिचिएको थियो र त्यसको कपिराइट आफ्नै स्वामित्वमा रहेको लिपाले दाबी गरेकी छन् ।

लिपाले सन् २०२५ जुनमा सामाजिक सञ्जालमार्फत यो विषयबारे जानकारी पाएकी थिइन् । फ्यानहरूले “दुआ लिपा टिभी बक्स” भन्दै फोटो र पोस्टहरू साझा गरेपछि यो विषय भाइरल बनेको बताइएको छ ।

मुद्दामा इन्स्टाग्रामका केही प्रतिक्रियासमेत समावेश गरिएको छ, जहाँ प्रयोगकर्ताहरूले दुआ लिपाको तस्बिर भएकै कारण उक्त टेलिभिजन खरिद गर्न चाहेको उल्लेख गरेका छन् । लिपाको कानुनी टोलीले सामसङलाई पटक–पटक उल्लङ्घन रोक्न आग्रह गरिए पनि कम्पनीले बेवास्ता गरेको आरोप लगाएको छ ।

लिपा यसअघि पुमा र भर्साचे जस्ता ब्रान्डसँग सहकार्य गरिसकेकी छन् । उनले एप्पल, पोर्श र च्यानल लगायतसँग पनि काम गरेकी छन् । हालै उनी  नेस्प्रेसोकी ग्लोबल एम्बेसेडर बनेकी छन् ।