काठमाडौँ– इस्तानबुलबाट काठमाडौँ आएको टर्किस एयरलाइन्सको जहाज त्रिभुवन अन्तर्राष्ट्रिय विमानस्थलमा अवतरण गर्ने क्रममा टायर विस्फोट हुँदा आगो निस्किएको छ ।

इस्तानबुलबाट आज (सोमबार) बिहान काठमाडौँ आएको टीके ७२६ कल साइनको विमान अवतरणका क्रममा एउटा टायर विस्फोट हुँदा आगोसँगै धुवाँ निस्किएको थियो । टायर फुटेपछि पांग्राको भागमा, इन्जिननजिकै आगो र धुवाँ देखिएको विमानस्थल नजिकैबाट पाइलट बेद उप्रेतीले बताए ।

त्यसपछि चालक दल र विमानस्थल प्रशासनले सुरक्षा सतर्कतास्वरूप यात्रुहरूलाई ढोकाबाट नभई आकस्मिक उद्धार (स्लाइड) मार्फत् बाहिर निकालेका हुन्।

अहिले त्रिभुवन अन्तर्राष्ट्रिय विमानस्थलमा जहाजको उडान र अवतरण बन्द गरिएको छ ।

जहाजमा ४ बच्चासहित २७७ यात्रु रहेका थिए । जहाजमा रहेका सम्पूर्ण यात्रु सुरक्षित रहेको नेपाल नागरिक उड्डयन प्राधिकरण (क्यान) का सूचना अधिकारी ज्ञानेन्द्र भुलले जानकारी दिए ।