काठमाडौं- नेपाल कम्युनिस्ट पार्टी (नेकपा) का संयोजक पुष्पकमल दाहाल प्रचण्डले दुईतिहाइ नजिकको बहुमत ल्याएको राष्ट्रिय स्वतन्त्र पार्टी (रास्वपा) का राम्रा काममा आफूहरूले समर्थन गर्ने बताएका छन् ।

बुधबार काठमाडौंमा सञ्चारकर्मीसँग कुराकानीका क्रममा दाहालले निर्वाचन सफलतापूर्वक भएकोमा खुसी व्यक्त गरे । उनले त्यसक्रममा रास्वपालाई शुभकामना दिए। उनी पछिल्लो चुनावी झट्काका कारण रास्वपासँग नजिकिने प्रयासमा छन् ।

नेपाली कांग्रेस र कम्यनुिस्टहरू पत्तासाफ हुने गरी आए पनि अहिलेको निर्वाचन परिणामलाई सकारात्मक रूपमा लिएको दाहाले बताए ।

‘रास्वपाले जसरी अत्यधिक बहुमत ल्याएको छ, उहाँहरूलाई शुभकामना छ’, उनले भने, ‘उहाँहरूले राम्रो काम गर्नुपर्छ । राम्रो काममा हाम्रो साथ र समर्थन रहनेछ ।’

सञ्चारकर्मीले त्यसक्रममा दाहाललाई म्याजिक नम्बरबारे पनि प्रश्न गरे । म्याजिक नम्बरको दाबीबारे प्रश्न गर्दा उनले जोगिने प्रयास गरे । ‘अहिले म्याजिक-स्याजिकको कुरा भएन। रास्वपालाई हाम्रो शुभकामना छ’, उनले भने ।

२१ फागुनको निर्वाचनमा उनी गोरखाबाट बसाइँ सरेर रुकुमपूर्वमा लडेका थिए । अन्य दलका सबै शीर्ष नेता हार्दा उनी भने माओवादीको गढमा गएर प्रतिनिधि सभा सदस्यमा जितेर आएका छन् ।

२२ वटा मिलेर बने पनि उनको पार्टीले निर्वाचनमा ७ सिट ल्यायो । उता समानुपातिकमा ८ लाख छुन सकेन । दाहालले चुनावअघि आफ्नो पार्टीले बहुमत ल्याउने बताएका थिए । तर कांग्रेस, एमाले जस्तै नेकपा पनि पत्तासाफ हुन पुगेको छ।