दोलखा– जिल्लाको वैतेश्वर गाउँपालिका-३ निमकोट र लप्सेका खेतीकिसानका लागि महत्त्वपूर्ण सिँचाइ कुलो निर्माण भइरहेको छ । यहाँका स्थानीयलाई लक्षित गरेर अहिले भस्मेखोला देखि अर्चले निमकोट लप्से बेसीँका स्थानीयले खेतीपातीको समय भोग्दै आएको सिँचाइ अभाव अब झेल्न नपर्ने भएको छ ।

यहाँका किसानको सहजताको लागि अहिले एडिबीको अनुदान सहयोग तथा नेपाल सरकारको समन्वयमा धमाधम भस्मेखोला देखि निमकोट लप्सेको ६० हेक्टर क्षेत्रको लागि दुई हजार दुई सय मिटर लामो सिँचाइ कुलो निर्माण भइरहेकाले यस अघि देखिँदै आएको सिँचाइ अभाव अब यहाँका किसानले भोग्नुपर्ने भएको छ ।

 यस अघि यस क्षेत्रका किसानले आकासे वर्षा र अस्थायी कुलोबाट पानी ल्याएर खेती गर्नुपर्ने बाध्यता थियो । तर एडिबीको दुई करोड ३२ लाख अनुदान सहयोगमा अहिले धमाधम पक्की आरसीसी ढलान कुलो निर्माण जारी रहेकाले जेठ अघि नै पक्की कुलोबाट खेतीपातीको लागि सिँचाइ उपभोग गर्न पाउने हुँदा पुरानो सिचाइ अभावको समस्या दीर्घकालीनरूपमा सहज हुन लागेको वैतेश्वर-३ का स्थानीय एवं सिंचाइकुलो निर्माणको लागि विगत लामो समयदेखि पहल गर्दै आएका स्थानीय मनिक तामाङले बताए ।

कुलो निर्माण उपभोक्ता समितिका अध्यक्ष समेत रहेका तामाङले मजुवाको भस्मे खोला देखि वैतेश्वर-५ को निमकोट-लप्सी खेतसम्मनै सिँचाइ पुर्याउन अहिले पक्की कुलो निर्माणको काम करिब ७० प्रतिशत सम्पन्न भएको उनले जानकारी दिए ।

कुलो निर्माण एडिबीको अनुदान सहयोगमा ठेक्का र उपभोक्ता समिति मार्फत निर्माण भइरहेको छ ।

यस अघि हातले खनेर अस्थायी रूपमा बनाएको कुलो बाढी आउँदा बगाउने अनि बनाउनुपर्ने बाध्यता एकातिर थियो भने अर्कोतिर ठाउँ ठाउँमा कुलो भत्किने र पानी चुहिने कारणले गर्दा निकै हैरानी खेपेर खेती गर्नुपर्ने अवस्था रहेको स्थानीय शान्ति बस्नेतले बताइन् ।
उनले भने, ‘पक्की कुलो निर्माण भएसँगै यहाँका खेती गर्ने किसानलाई सहज हुने छ ।

उनका अनुसार कुलो निर्माण भएसँगै अब खाद्यान्न बाली, धान,गहुँ,मकै,आलु,तरकारी लगायतका नगदेबाली उत्पादनमा धेरै सहज हुने भएको छ । उक्त कुलो निर्माण सम्पन्न हुँदा वैतेश्वर गाउँपालिका ३,४,५ र २ का एक सय ९५ घरधुरीले सहजरूपमा सिँचाइको उपभोग गर्न सक्ने छन् । सुवाश बस्नेत/दोलखा