काठमाडौं– राष्ट्रिय स्वतन्त्र पार्टीकी सांसद तोसिमा कार्कीले प्रसव पीडामा अस्पताल पुगेकी गर्भवती महिलालाई तत्काल उपचार र सुरक्षित भर्नाको व्यवस्था गर्नुपर्ने बताएकी छन् । 

प्रतिनिधिसभा बैठकमा बोल्दै सांसद कार्कीले राजविराजस्थित गजेन्द्रनारायण सिंह सगरमाथा अस्पतालमा भर्ना नलिएपछि सडकमा बच्चा जन्माउन बाध्य भएकी बबिताको घटनालाई लिएर यस्तो बताएकी हुन् ।

कार्कीले प्रसवका लागि अस्पताल पुगेकी महिलाको आर्थिक अवस्था नहेरी तत्काल क्लिनिकल मूल्यांकन र उपचार सुरु गर्नुपर्ने बताइन्। उनले प्रसव पीडामा रहेकी महिलालाई तत्काल भर्ना गरेर आवश्यक उपचार तथा निगरानी गर्नुपर्नेमा जोड दिइन् ।

‘राज्य खोज्दै बबिता अस्पतालसम्म पुगिन्, तर राज्यको सेवा बबितासम्म पुगेन,’ उनले भनिन्।

उनले अस्पतालले बिरामीको सम्पर्क नम्बर लिएपछि बिरामी सम्पर्कविहीन हुँदा खोजी गर्नुपर्ने र आपत्कालीन निगरानी प्रणाली प्रभावकारी बनाउनुपर्ने बताइन् । आर्थिक अवस्था कमजोर भएका बिरामीका लागि अस्पतालको सामाजिक सेवा इकाई र आमा सुरक्षा कार्यक्रम तत्काल सक्रिय हुनुपर्ने उनको भनाइ छ ।

उनले आमा सुरक्षा कार्यक्रमलाई बच्चा जन्माउने सेवा मात्र नभई गर्भावस्थादेखि सुत्केरी र शिशु सेवासम्म समेटिने ‘सम्पूर्ण मातृ स्वास्थ्य प्याकेज’का रूपमा विस्तार गर्न सरकारसँग माग गरिन् । आवश्यक जाँच, औषधि, उपचार, भिडियो एक्सरे लगायतका सेवा निःशुल्क उपलब्ध गराउने व्यवस्था गर्नुपर्ने उनले बताइन्।