काठमाडौं – प्रधानमन्त्रीको सीमा सम्बन्धी अभिव्यक्ति संसद्को रेकर्डबाट हटाउनुपर्ने माग गर्दै विपक्षी दलका सांसदहरूले मंगलबार पनि प्रतिनिधिसभा बैठकमा विरोध जनाएका छन् ।

मंगलबार बसेको प्रतिनिधिसभा बैठक सुरु हुनेबित्तिकै विपक्षी दलका सांसदहरू उठेर विरोध जनाएका थिए । त्यसपछि सभामुख डोलप्रसाद अर्यालले नेपाली कांग्रेसका सांसद भरतकुमार स्वारलाई बोल्न समय दिएका थिए ।

सांसद स्वारले प्रधानमन्त्रीले भारतसँगको सीमा विवादबारे जिम्मेवार अभिव्यक्ति नदिएको आरोप लगाउँदै संसद्मा माफी माग्नुपर्ने माग गरे । प्रधानमन्त्रीले आफ्नो अभिव्यक्तिबारे स्पष्टीकरण दिनुको साटो आफू ‘नाकाबन्दी वा घेराबन्दीमा परेको’ भन्दै अभिव्यक्ति दिएकोप्रति उनले आपत्ति जनाए ।

लिम्पियाधुरा, कालापानी र सुस्ता नेपालको भूभाग भएको स्पष्ट हुँदाहुँदै पनि सरकारले यस विषयमा मौनता साँधेको आरोपसमेत स्वारले लगाए ।

भ्रष्टाचार नियन्त्रणका लागि सबै नेता तथा जनप्रतिनिधिको सम्पत्ति, सुनचाँदी र जग्गाजमिनको विवरण सार्वजनिक गरी निष्पक्ष छानबिन गर्नुपर्ने उनको भनाइ थियो । उनले सरकारलाई विभिन्न घटनाका छानबिन प्रतिवेदन पारदर्शी रूपमा जनतासमक्ष ल्याउन चुनौतीसमेत दिए ।

विभिन्न घटनाका छानबिन प्रतिवेदन सार्वजनिक गर्न प्रधानमन्त्रीलाई कसले रोकेको छ भन्दै उनले प्रश्न गरे ।

अन्य विपक्षी सांसदहरूले पनि प्रधानमन्त्रीको सीमा सम्बन्धी अभिव्यक्ति नसच्चिएसम्म संसद्मा विरोध जारी राख्ने बताएका छन् । उनीहरूले प्रधानमन्त्रीले संसद्मा आएर आफ्नो अभिव्यक्तिबारे स्पष्ट जवाफ दिनुपर्ने माग गरेका छन् ।