काठमाडौं- अख्तियार दुरुपयोग अनुसन्धान आयोगले सरकारी कागजात सच्याएर निजी गुठीको जग्गा व्यक्तिको नाममा दर्ता गरेको अभियोगमा मालपोत कार्यालय, टोखा सरस्वतीका तत्कालीन कार्यालय प्रमुख सुबोध कुमार खनालसहित २७ जनाविरुद्ध विशेष अदालतमा आरोप–पत्र दायर गरेको छ ।

आयोगका अनुसार काठमाडौं जिल्लाको साविक साङ्ग्ला गाउँ विकास समिति वडा नम्बर ९ मा रहेको निजी गुठीको जग्गाहरू आपसी मिलेमतोमा सरकारी कागजात सच्याई व्यक्ति विशेषको नाममा कायम गराएर भ्रष्टाचार गरिएको अनुसन्धानबाट खुलेको छ । 

प्रतिवादीहरूमाथि गलत लिखत तयार पारेको, सरकारी कागजात सच्याएको र सरकारी सम्पत्तिमा नोक्सान पुर्‍याएको गम्भीर आरोप लगाइएको छ ।

मुद्दा दायर गरिएका २७ जना प्रतिवादीहरूमा मालपोत कार्यालय टोखा सरस्वतीका तत्कालीन कार्यालय प्रमुख खनालसहित अन्य कर्मचारी तथा संलग्न व्यक्तिहरू रहेका छन् । 

अख्तियारले उनीहरूविरुद्ध भ्रष्टाचार निवारण ऐन, २०५९ को दफा ९, दफा ११, दफा १२ र दफा १९ को उपदफा (२) बमोजिमको कसुरमा सजायको माग दाबी गरेको छ । आयोगले अभियुक्तहरूलाई ऐनको सोही व्यवस्था अनुसार कैद र जरिवाना सजाय गर्न माग गर्दै मुद्दा दायर गरेको हो ।