दोधारा चाँदनी– कञ्चनपुरमा तोरीखेती विस्तार हुँदै गएको छ । कम लागतमा राम्रो उत्पादन हुने र बजारमा सहज बिक्री हुने भएकाले यहाँका किसान तोरीखेतीतर्फ आकर्षित भएका हुन् । जिल्लामा करिब ३०० हेक्टरमा तोरीखेती विस्तार भएको कृषि ज्ञान केन्द्र कञ्चनपुरले जनाएको छ । 

 ज्ञान केन्द्रका सूचना अधिकारी धर्म साउदले तोरी पकेट क्षेत्र निर्धारण गरेर किसानलाई ५० प्रतिशत अनुदान र प्राविधिक सहयोग गरिरहेकाले पनि खेती विस्तारमा टेवा पुगेको बताए। 

उनले भने, ‘यस वर्ष मात्रै १९३ हेक्टरमा तोरीखेती विस्तार भएको छ  । ज्ञान केन्द्रबाट यो खेती गर्ने किसानलाई बीउ, सिँचाइ सुविधा र प्राविधिक सहयोग भइरहेको छ ।’

ज्ञान केन्द्रले बेलौरी नगरपालिकामा तोरी पकेट क्षेत्र निर्धारण गरेर किसानलाई अनुदानका लागि ४० लाख बजेट विनियोजन गरिएको छ। अनुदान कार्यक्रमले मात्रै १५० हेक्टर क्षेत्रमा खेती विस्तार भएको जनाइएको छ । 

सूचना अधिकारी साउदले ज्ञान केन्द्रबाट किसान, समूह र सहकारीलाई ५० प्रतिशत अनुदान र प्राविधिक सहयोग हुँदै आएको बताए। 

यहाँ मोरङ, प्रीति, उन्नति विकास जातको तोरीखेती हुने गरेको छ । जिल्लामा छ हजार २५० हेक्टर क्षेत्रफलमा तोरीखेती हुने गरेको र उत्पादकत्व एक मेट्रिक टन प्रतिहेक्टर रहेको ज्ञान केन्द्रले जनाएको छ ।