मनिला– उत्तरी फिलिपिन्सको बागुइओ सहरमा पहिरोमा परी चार जनाको मृत्यु भएको छ भने छ जना बेपत्ता भएका छन्।

स्थानीय सञ्चारमाध्यमका अनुसार आइतबार साँझ करिब ७ बजे बागुइओको बारान्गे गुइसद सुरोङस्थित रिभरसाइड क्षेत्रमा पहिरो गएको हो। पहिरोमा तीन घर पुरिँदा १३ जना भग्नावशेषमा पुरिएका थिए।

प्रहरीका अनुसार सोमबार बिहानसम्म उद्धारकर्मीले सात जनालाई जीवितै उद्धार गरेका छन्। पहिरोमा मृत्यु हुनेमा १७ वर्षीया किशोरी, नौ वर्षका दुई बालबालिका र ५६ वर्षीय पुरुष रहेका छन्।

उद्धार गरिएकामध्ये तीन जनाको अस्पतालमा उपचार भइरहेको प्रहरीले जनाएको छ। लगातार बीचबीचमा वर्षा भइरहे पनि उद्धारकर्मीले बेपत्ता भएकाहरूको खोजी तथा उद्धार कार्यलाई निरन्तरता दिएका छन्।

यसैबीच, पहिरोको जोखिममा रहेका १४ परिवारका ६२ जनालाई सुरक्षित स्थानमा स्थानान्तरण गरिएको छ। थप सात जनालाई स्थानीय गाउँको सभाहलमा राखिएको छ।

प्रशासनले प्रभावित क्षेत्रमा उद्धार तथा राहत कार्यलाई तीव्र बनाउँदै जोखिममा रहेका बासिन्दालाई सुरक्षित स्थानमा जान आग्रह गरेको छ।