काठमाडौं– पेशागत निरन्तरता र स्थायित्व सहित समानताको हक सुनिश्चितताको माग गर्दै सङ्घीय शिक्षण सिकाइ अनुदान शिक्षकहरूले काठमाडौंमा प्रदर्शन गरेका छन् ।  

सरकारले ल्याएको बजेटमा आफूहरूलाई उपेक्षा गरिएको भन्दै सङ्घीय शिक्षण सिकाइ अनुदान शिक्षक केन्द्रीय समितिले मंगलबार काठमाडौंको माइतिघरमा विरोध प्रदर्शन गरेका हुन् ।

उनीहरूले समान रुपमा तलब वृद्धि हुनुपर्ने, प्रोत्साहन भत्ता समान ढंगले लागू हुनुपर्ने, महँगी भत्ता तत्काल लागू हुनुपर्ने, सामाजिक सुरक्षा कोषको प्रबन्ध हुनुपर्ने लगायतका माग राखेका छन् ।

नेपाल सरकार तथा शिक्षा मन्त्रालयसँग विगतमा भएका सबै सहमतिको अक्षरशः कार्यान्वयन हुनुपर्ने आफूहरूको मुख्य माग रहेको अनुदान शिक्षक कौशिक शर्माले बताए ।  

उनीहरूले आन्तरिक तथा खुला प्रतिस्पर्धामार्फत व्यवस्थापन गर्ने सहमति समेत कार्यान्वयन हुनुपर्नेमा जोड दिएका छन् ।