काठमाडौं– निर्वाचन आयोग नेपालले सार्वजनिक गरेको पछिल्लो विवरण अनुसार प्रतिनिधिसभा निर्वाचन २०८२ को समानुपातिकतर्फ हालसम्म ९७ लाख ५१ हजार २३२ मत गणना भएको छ।

निर्वाचन आयोगका अनुसार प्रतिनिधिसभा निर्वाचन २०८२ को समानुपातिकतर्फ हालसम्म ९७ लाख ५१ हजार २३२ मत गणना हुँदा श्रम संस्कृति पार्टी राष्ट्रिय दल बनेको छ। प्रत्यक्षतर्फ खोटाङ, भोजपुर र सुनसरी १ मा जितेको उसले अब कम्तीमा ४ समानुपातिक सिट पाउँछ ।

हर्क साम्पाङ नेतृत्वको नयाँ दल श्रम संस्कृति पार्टीले चुनावमा भाग लिएको पहिलो प्रयासमा राष्ट्रिय दलको मान्यता पाएको हो । ९७ लाख मत गनिसक्दा उसले अहिलेसम्म ३ लाख ३२ हजार ८३७ मत प्राप्त गरिसकेको छ ।

उता राष्ट्रिय प्रजातन्त्र पार्टी पनि आवश्यक मतको नजिक पुग्दै राष्ट्रिय दलको दौडमा देखिएको छ। राष्ट्रिय प्रजातन्त्र पार्टी ले ३ लाख ९ हजार ७८५ मत प्राप्त गर्दै राष्ट्रिय दल बन्ने करिब निश्चित गरेको छ।

यसैबीच राष्ट्रिय स्वतन्त्र पार्टी भने स्पष्ट अग्रता कायम गर्दै सबैभन्दा धेरै मतसहित पहिलो स्थानमा रहेको छ।

गणनाअनुसार राष्ट्रिय स्वतन्त्र पार्टी स्पष्ट अग्रतासहित पहिलो स्थानमा रहेको छ। रास्वपाले ४६ लाख ९८ हजार ४१० मत प्राप्त गरेको छ।

दोस्रो स्थानमा रहेको नेपाली कांग्रेस ले १५ लाख ८० हजार ३०९ मत पाएको छ भने तेस्रो स्थानमा रहेको नेपाल कम्युनिष्ट पार्टी (एकीकृत मार्क्सवादी लेनिनवादी) ले १३ लाख १७ हजार ५१४ मत प्राप्त गरेको छ।

यसैगरी नेपाल कम्युनिष्ट पार्टी (माओवादी केन्द्र) ले ७ लाख १० हजार ४८० मत प्राप्त गर्दै चौथो स्थानमा रहेको छ।