लन्डन- बेलायतको हवाई यातायात व्यवस्थापन प्रणालीमा देखिएको प्राविधिक समस्याका कारण मंगलबार देशभर एक हजारभन्दा बढी उडान रद्द भएका छन्।

समस्याका कारण हजारौँ यात्रु प्रभावित भएका छन् भने विभिन्न विमानस्थलमा उडान ढिलाइ र पुनःतालिकीकरणको चाप बढेको छ।

बेलायतको राष्ट्रिय हवाई यातायात सेवा संस्थाले मंगलबार दिउँसो आफ्नो उडान व्यवस्थापन प्रणालीमा प्राविधिक समस्या देखिएको जनाएको थियो। प्रणालीमा समस्या आएपछि देशभरका विमानस्थलबाट हुने हवाई सेवा प्रभावित भएको थियो।

प्राविधिक समस्याको असर लन्डनको हिथ्रो, एडिनबर्ग र म्यानचेस्टरलगायत प्रमुख विमानस्थलमा समेत परेको थियो। उडान अनुगमनसम्बन्धी तथ्यांकका आधारमा मंगलबार रातिसम्म बेलायतका विभिन्न विमानस्थलबाट एक हजारभन्दा बढी उडान रद्द भएको स्थानीय सञ्चारमाध्यमले जनाएका छन्।

राष्ट्रिय हवाई यातायात सेवा संस्थाले समस्या समाधानका लागि आवश्यक सुधार लागू गरिसकेको जनाएको छ। संस्थाका अनुसार प्रणालीमा देखिएको प्राविधिक समस्या पूर्ण रूपमा समाधान भइसकेको छ र हवाई सेवा सामान्य अवस्थामा फर्किएको छ।

यद्यपि, रद्द तथा ढिलाइ भएका उडानका कारण सिर्जना भएको बाँकी चाप व्यवस्थापन गर्न थप समय लागिरहेको संस्थाले जनाएको छ। प्रभावित यात्रु तथा उडानको व्यवस्थापन गर्न अधिकतम प्रयास भइरहेको पनि संस्थाले स्पष्ट पारेको छ।

उडान रद्द तथा ढिलाइका कारण विमानस्थलमा यात्रुको भीड बढेको छ भने एयरलाइन्सहरूले प्रभावित उडानलाई पुनःतालिकीकरण गर्ने काम गरिरहेका छन् ।