काठमाडौँ – नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले विविधताको सम्मान र समान अधिकारबिना राष्ट्रिय एकता बलियो हुन नसक्ने बताएका छन्। विश्व आदिवासी जनताको अन्तर्राष्ट्रिय दिवसका अवसरमा शुभकामना सन्देश दिँदै उहाँले सो कुरा बताएका हुन्।

नेपाली जनताको लामो सङ्घर्ष र बलिदानबाट प्राप्त समावेशी, समानुपातिक र सहभागितामूलक अधिकारको रक्षा गर्दै बाँकी अधिकार प्राप्तिका लागि सङ्घर्षलाई सशक्त बनाउनुपर्नेमा प्रचण्डले जोड दिएका छन्।

सबै जाति, भाषा, संस्कृति र समुदायको न्यायपूर्ण प्रतिनिधित्व तथा सम्मानपूर्ण सहभागिताबाट मात्र समावेशी लोकतन्त्र, सामाजिक न्याय र सुदृढ राष्ट्र निर्माण सम्भव हुने उहाँको भनाइ छ। दिवसले अधिकार, समानता र न्यायको सङ्घर्षलाई अघि बढाउने प्रेरणा दिने विश्वास उनले व्यक्त गरेका छन्।