काठमाडौं- सम्पत्ति शुद्धीकरण (मनी लाउण्डरिङ) सम्बन्धी मुद्दामा पक्राउ परेका व्यवसायी दीपक भट्ट र शुलभ अग्रवालको हिरासत म्याद थप गरिएको छ।

विशेष अदालतको प्रशासन शाखाका अनुसार दुवै प्रतिवादीको म्याद सोमबार थप गरिएको हो।

भट्टको हकमा आठौँ पटक र अग्रवालको हकमा नवौँ पटक ३–३ दिनका लागि म्याद थप भएको हो। विशेष इजलासमा न्यायाधीश नारायण प्रसाद पौडेल र उमेश कोइरालाको उपस्थितिबाट यो आदेश भएको हो ।

यसअघि सम्पत्ति शुद्धीकरण अनुसन्धानका क्रममा उनीहरू लामो समयदेखि प्रहरी हिरासतमा रहेका छन्। व्यवसायी दीपक भट्टलाई चैत १८ गते ललितपुरबाट पक्राउ गरिएको थियो । शुलभ अग्रवाललाई चैत २१ गते पक्राउ गरिएको हो।

अनुसन्धानमा संलग्न निकायका अनुसार दुवै जना सम्पत्ति शुद्धीकरण सम्बन्धी आरोपमा अनुसन्धानको दायरामा छन्। हाल भट्टलाई प्रहरी वृत्त बौद्ध र अग्रवाललाई जिल्ला प्रहरी परिसर ललितपुरको हिरासतमा राखिएको छ।

अनुसन्धानका क्रममा हिमालयन रिइन्स्योरेन्ससँग सम्बन्धित वित्तीय कारोबारसमेत छानबिनको दायरामा आएको छ।

लामो समय हिरासतमा रहँदा शुलभ अग्रवालको स्वास्थ्यमा समस्या देखिएको छ। उनलाई पटक–पटक अस्पताल भर्ना गरिएको छ ।

पछिल्लो पटक उपचारपछि उनलाई पुनः हिरासतमा राखिएको छ। सम्पत्ति शुद्धीकरण अनुसन्धान अन्तिम चरणमा पुगेको छ ।