काठमाडौं– नेपाल स्केटिङ तथा स्केटबोर्डिङ संघले ९औँ राष्ट्रिय स्केटबोर्ड प्रतियोगिता–२०८३ आगामी जेठ ३० र ३१ गते काठमाडौंमा आयोजना गर्ने भएको छ।

संघका महासचिव सत्य थापाका अनुसार प्रतियोगिता काठमाडौँ महानगरपालिका–हाँडिगाउँस्थित यमबुद्ध स्केटपार्क (पहेंलो पुल) मा बिहान ११ बजेबाट सुरु हुनेछ। प्रतियोगितामा देशभरका खेलाडीहरूको सहभागिता रहनेछ।

नेपाल स्केटिङ तथा स्केटबोर्डिङ संघ का अनुसार यस वर्षको प्रतियोगितामा २५० जना पुरुष र १५० जना महिला खेलाडी सहभागी हुनेछन्। प्रतियोगिता फ्रिस्टाइल विधामा बेस्ट ट्रिक र बेस्ट रनका आधारमा सञ्चालन गरिनेछ।

जेठ ३० गते छनोट चरणका खेलहरू हुनेछन् भने जेठ ३१ गते अन्तिम प्रतिस्पर्धा हुनेछ। प्रतियोगिताबाट ‘स्केटबोर्ड अफ द इयर’ समेत घोषणा गरिने जनाइएको छ।

सिनियर पुरुष र महिलातर्फ विजेताले क्रमशः ३० हजार, २० हजार र १५ हजार रुपैयाँ पुरस्कार प्राप्त गर्नेछन्। जुनियर पुरुष र महिलातर्फ भने क्रमशः १५ हजार, १० हजार र ५ हजार रुपैयाँ पुरस्कार प्रदान गरिनेछ।

संघले स्केटबोर्डिङ खेलप्रति युवा पुस्ताको आकर्षण बढ्दै गएको उल्लेख गर्दै यस प्रतियोगिताले खेलको विकास र विस्तारमा महत्वपूर्ण योगदान पुर्‍याउने विश्वास व्यक्त गरेको छ।

प्रतियोगिता सम्पन्न गर्न खेलकुद तथा शिक्षा मन्त्रालय, राष्ट्रिय खेलकुद परिषद् र नेपाल ओलम्पिक कमिटीका पदाधिकारीहरूको उपस्थिति रहने पनि आयोजकले जनाएको छ।