काठमाडौं– नेपाली कम्युनिष्ट पार्टी(नेकपा) का सांसद महेन्द्र बहादुर शाहीले संघीयता, गणतन्त्र, समावेशिता लगायतका उपलब्धिहरूलाई जोगाउनु सबैको साझा दायित्व भएको बताएका छन् । 

बुधबार प्रतिनिधिसभा बैठकको विशेष समयमा सांसद शाहीले अहिलेको नेपाली राजनीतिक जग संघीयता, गणतन्त्र, समावेशिता भएको भन्दै प्राप्त उपलब्धिहरू जोगाउनु सबैको साझा दायित्व भएको बताएका हुन् । 

देशमा उदयका नयाँ राजनीतिक शक्तिहरूले जनताले दिएको जिम्मेवारी पूरा गर्ने विश्वास व्यक्त गर्दै उनले देशको समग्र विकासका लागि सधैँ रचनात्मक साथ रहने धारणा राखे । 

उनले संसद् तथ्यमा आधारित बौद्धिक बहस गर्ने थलो भएकाले एक अर्काले गालीगलौज, आरोप प्रत्यारोप नभई एक ठाउँमा उभिएर विकास, आर्थिक समृद्धि, सुशासन, सामाजिक न्यायका विषयमा बहस हुनुपर्नेमा जोड दिए ।

त्यस्तै उनले सबै भ्रष्टाचारका काण्डहरूको निष्पक्ष छानबिन गरी दोषीलाई कारबाही गर्न र भ्रष्टाचारविरुद्ध शून्य सहनशीलताको नीति अवलम्बन गर्न सुझाव दिए । 

सांसद शाहीले उत्पादनमुखी अर्थतन्त्र र राष्ट्रिय पुँजीको विकास नगरी देश अगाडि बढ्न नसक्ने भएकाले वैदेशिक अनुदान र ऋणको भरमा मात्र नभई आत्मनिर्भर अर्थतन्त्रको विकास आवश्यक रहेको बताए । 

नेपालको भूराजनीतिक संवेदनशीलताप्रति सचेत रहँदै पञ्चशीलको सिद्धान्त र असंलग्न परराष्ट्र नीतिका आधारमा मात्र परराष्ट्र सम्बन्ध अघि बढाउन उनले सरकारलाई सुझाव दिए ।