काठमाडौं– राष्ट्रिय स्वतन्त्र पार्टी (रास्वपा) की सांसद लिमा अधिकारीले नागरिकले गर्व र अपनत्व महसुस गर्नेगरि काम गर्न सरकारलाई सुझाव दिएकी छन्।

बुधबार प्रतिनिधिसभाको विशेष समयमा बोल्दै सांसद अधिकारीले जनताले ठूलो विश्वास देखाएर रास्वपालाई मत दिएको उल्लेख गर्दै, नागरिकले ‘सरकार हाम्रो हो’ भनी गर्वका साथ भन्न सक्ने वातावरण बनाउनुपर्ने बताइन्।

उनले हाल नेपालको राजनीतिक अवस्था अस्थिर भएको भए पनि, भागबन्डा नभई स्पष्ट परिणाम दिने काममा जोड दिनुपर्नेमा जोड दिइन्। विपद्का बेला पनि राज्यले नागरिकसँग दूरी राख्ने नभई हात थाम्ने सहारा बन्नुपर्ने उनको भनाइ थियो।

सांसद अधिकारीले उद्यमशीलता प्रवर्द्धन गर्ने, सुरक्षित र आशावादी वातावरण सुनिश्चित गर्ने र सरकारी सेवाबाट हरेक नागरिकले निराशा नभई सन्तुष्टि र आत्मसम्मान अनुभव गर्ने व्यवस्था हुनुपर्ने बताए।

त्यसैगरी, उनले जेन-जी आन्दोलनको मर्मअनुसार नयाँ सोच, नयाँ ऊर्जा र उत्तरदायी नेतृत्वमार्फत देशलाई सही दिशामा लैजानुपर्नेमा जोड दिइन् ।