काठमाडौं- ०७९ को निर्वाचनमा पहिलो दल बनेको नेपाली कांग्रेस ८२ को निर्वाचनमा १७ सिटमा सिमित हुने अवस्थामा पुगेको छ । २०७९ को निर्वाचनमा प्रत्यक्षतर्फ ५७ सिट प्राप्त गर्दै पहिलो पार्टी बनेको नेपाली कांग्रेस यसपटक १७ सिटमा सीमित हुने अवस्थामा छ ।

अहिलेसम्मको नतिजा हेर्दा कांग्रेसले १७ स्थानमा जित्दा कुनै पनि ठाउँमा अग्रता कायम राख्न सकेको छैन । समानुपातिकको प्रारम्भिक मत परिणाममा पनि नेपाली कांग्रेसले उत्साहजनक मत नल्याएको अवस्थाले गर्दा कांग्रेस ३० या ३५ सिट भन्दा बढी नल्याउने अवस्थामा देखिन्छ । हालसम्मको नतिजामा नेपाली कांग्रेसले ७ लाख ३४ हजार ६५१ समानुपातिकमा मत ल्याएर दोस्रो दल बनेको देखिन्छ ।

पहिलो दाल बन्न लागेको राष्ट्रिय स्वतन्त्र पार्टीले २१ लाख ४८ हजार १३० मत ल्याएको छ। २०७९ को निर्वाचनमा नेपाली काङ्ग्रेसले २५ लाख ८५ हजार ९० मत ल्याएर दोस्रो दल बनेको थियो । नेकपा एमालेले २७ लाख २०६३९ मत ल्याएर समानुपातिकमा पहिलो दल बन्यो । देशभर १६५ निर्वाचन क्षेत्रमध्ये अब १० वटा क्षेत्रको मात्रै मत परिणाम आउन बाँकी छ ।

प्रत्यक्षमा १० क्षेत्रको मत परिणाम आउन बाँकी रहँदा राष्ट्रिय स्वतन्त्र पार्टीले छ क्षेत्रमा अग्रता लिइरहेको छ भने ११९ क्षेत्रमा विजय हासिल गरेको छ । नेकपा एमालेले सात ठाउँ जितेर तीन ठाउँ अग्रता कायम गर्दा नेकपाले सात ठाउँ जितेर एक ठाउँ अग्रता कायम गरेको छ।

स्वतन्त्र उम्मेदवारले एक ठाउँ जितेका छन् भने राष्ट्रिय प्रजातन्त्र पार्टीले एक ठाउँमा विजय हासिल गरेको छ । हर्क साम्पाङको श्रम संस्कृति पार्टीले तीन ठाउँ विजय हासिल गर्दा अग्रता कुनै पनि स्थानमा कायम राखेको छैन ।