किएभ- युक्रेनमा रूसले गरेको पछिल्लो आक्रमणमा मृत्यु हुनेको सङ्ख्या बढेर २१ पुगेको युक्रेनी अधिकारीहरूले जनाएका छन्।

स्थानीय प्रशासन र उद्धार टोलीले सबैभन्दा बढी प्रभावित क्षेत्रका दुई क्षतिग्रस्त आवासीय भवनमा पुरिएकाहरूको खोजी तथा उद्धार कार्य जारी राखेका छन्। मृतकको सङ्ख्या अझै बढ्न सक्ने आशङ्का गरिएको छ।

अधिकारीहरूका अनुसार आक्रमणमा ब्यालेस्टिक मिसाइल, क्रुज मिसाइल र ड्रोन प्रयोग गरिएको थियो।

यसअघि युक्रेनी राष्ट्रपति भोलोदिमिर जेलेन्स्कीले राजधानी किएभमा ठूलो रूसी आक्रमण हुन सक्ने चेतावनी दिएका थिए। प्रारम्भिक विवरणमा ११ जनाको मृत्यु भएको बताइए पनि पछिल्लो अद्यावधिकअनुसार मृतकको सङ्ख्या २१ पुगेको पुष्टि भएको हो।

रूस र युक्रेनबीच सन् २०२२ फेब्रुअरी २४ देखि जारी युद्धका क्रममा दुवै पक्षले एकअर्कामाथि आक्रमण गरेको दाबी गर्दै आएका छन्। युद्धका कारण सार्वजनिक हुने धेरै विवरण स्वतन्त्र रूपमा पुष्टि हुन सकेका छैनन्।