काठमाडौं– इजरायली सेनाले कब्जामा रहेको वेस्ट ब्यांकका विभिन्न क्षेत्रमा सञ्चालन गरेको गिरफ्तारी अभियानका क्रममा बिहीबार १७ जना प्यालेस्टिनी नागरिकलाई पक्राउ गरेको जनाएको छ ।

स्थानीय स्रोतका अनुसार इजरायली सेनाले कल्किल्याको पूर्वमा रहेको अजुन सहर र दक्षिणमा रहेको हाबला सहरमा छापा मार्दै १४ जना प्यालेस्टिनीलाई पक्राउ गरेको हो । छापामार कारबाहीका क्रममा सेनाले घरहरूको खोजतलास गर्नुका साथै सामग्रीसमेत तोडफोड गरेको बताइएको छ ।

त्यसैगरी, नब्लुसको पूर्वमा रहेको न्यू अस्कर शरणार्थी शिविरबाट एक जना, हेब्रोनको दक्षिणमा रहेको यट्टा सहरबाट एक जना तथा बेथलेहेमको दक्षिणमा रहेको वाडी राहल गाउँबाट एक युवकलाई पक्राउ गरिएको जनाइएको छ ।

इजरायली सेनाले टुबास सहरमा पनि सैन्य कारबाही सञ्चालन गरेको दाबी गर्दै तम्मुन क्षेत्रमा घर–घरमा छापा मारेको जनाएको छ ।

कब्जा गरिएको वेस्ट ब्यांक र पूर्वी जेरुसेलमका विभिन्न सहर तथा शरणार्थी शिविरमा इजरायली सेनाले दैनिकजसो छापा मार्ने, गिरफ्तारी गर्ने तथा आक्रमण गर्ने गतिविधि जारी राखेको आरोप लाग्दै आएको छ ।