काठमाडौं- राष्ट्रिय स्वतन्त्र पार्टी (रास्वपा)का सांसद गणेश पराजुलीले चक्रपथ पुननिर्माणलाई तीव्रता दिन माग गरेका छन् ।

मंगलबार बसेको प्रतिनिधिसभा बैठकको शून्य समयमा उनले चक्रपथ निर्माणको प्रक्रियाले विकासको लथालिङ्ग अवस्था उजागार गरेको बताएका हुन् । उनले सन् २०१८ मा सुरु भएको चक्रपथ निर्माणको प्रक्रियाले विकासको लथालिङ्ग अवस्था उजागर गरेको बताए ।

अब उक्त योजना तीव्र गतिमा सम्पन्न गराउन सरकारसँग सांसद पराजुलीको माग छ । ‘चक्रपथ निर्माणमा ढिलाइ हुँदा जनताले धुलो र हिलो भोग्नुपरेको समस्या चाँडै समाधान होस्,’ उनले भने ।

योसँगै आफ्नो निर्वाचन क्षेत्रमा पर्ने ढुङ्गेधाराको डुबानको समस्या समाधानका लागि पनि उनले सरकारसँग आग्रह गरे । ‘मेरो निर्वाचन क्षेत्रमा पर्ने ढुङ्गेधाराका नागरिकले वर्षौदेखि डुबानको समस्या खेप्नुपरेको छ । यस्तै त्यहाँ निर्माण गर्नुपर्ने अण्डरपासको काम पनि भएको छैन,’ उनले भने ।

यस्तै, बर्खायाम सुरु हुनुअधिनै समस्या समाधानको योजना बनाउन सरकारलाई उनले सुझाव दिएका छन् ।