मेक्सिको- मेक्सिकोको मध्य क्षेत्रमा रहेको मेक्सिको राज्यको टेमास्काल्सिङ्गो नगरपालिकामा धार्मिक पर्वका क्रममा भण्डारण गरेर राखिएको पटाका विस्फोट हुँदा कम्तीमा १० जनाको मृत्यु भएको छ भने ६४ जना घाइते भएका छन्।

राज्य सरकारले दिएको जानकारीअनुसार शनिबार राति स्थानीय समयअनुसार करिब साढे ९ बजे एउटा चर्चमा पटाका विस्फोट भएको हो। विस्फोटका कारण चर्चको छानोको केही भाग र नजिकैको पर्खाल भत्किएको थियो। त्यस क्रममा केही मानिस भग्नावशेषमा पुरिएका थिए।

विस्फोटमा घटनास्थलमै आठ जनाको मृत्यु भएको थियो। घाइतेहरूलाई तत्काल उद्धार गरी उपचारका लागि आसपासका अस्पतालमा लगिएको अधिकारीहरूले बताएका छन्।

घटनापछि उद्धार तथा सुरक्षा व्यवस्थापनका लागि नागरिक सुरक्षा टोली, सशस्त्र सेना र राज्य प्रहरी परिचालन गरिएको थियो। घटनास्थलमा बाँकी रहेको विस्फोटक सामग्रीको समेत जाँच गरिएको थियो।

थप जोखिम हुन नदिन घटनास्थलमा रहेका विस्फोटक सामग्रीलाई विशेषज्ञको सहयोगमा सुरक्षित रूपमा निष्क्रिय पार्न आवश्यक सुझाव दिइएको अधिकारीहरूले बताएका छन्।

विस्फोटको वास्तविक कारणबारे सम्बन्धित निकायले थप अनुसन्धान गरिरहेको छ।