काठमाडाैँ – अमेरिकाको मियामी अन्तर्राष्ट्रिय विमानस्थलमा अवतरणका क्रममा एमेजनको कार्गो विमान धावनमार्गबाट बाहिरिएर गाडीहरूसँग ठोक्किँदा कम्तीमा पाँच जनाको मृत्यु भएको छ । आइतबार दिउँसो भएको उक्त दुर्घटनामा अन्य पाँच जना घाइते भएका छन् ।

मियामी-डेड फायर रेस्क्युका प्रमुख रायद ‘रे’ जादाल्लाहका अनुसार घाइतेमध्ये तीन जनाको अवस्था गम्भीर रहेको र उनीहरूलाई त्यहाँको ट्रमा सेन्टरमा भर्ना गरिएको बिबिसीले खबर लेखेकाे छ । अन्य दुई जनाको स्थानीय अस्पतालमा उपचार भइरहेको छ । विमानले धावनमार्ग छाडेर नजिकैका गाडीलाई टक्कर दिएपछि भीषण आगलागी भएको थियो ।

दुर्घटना लगत्तै ६० भन्दा बढी उद्धार टोली घटनास्थल पुगेका थिए । गाडीभित्र चेपिएका यात्रुलाई उद्धार टोलीले बाहिर निकालेको थियो भने विमानका पाइलटलाई उद्धार गरी उपचारका लागि पठाइएको छ ।

‘फ्लाइटराडार २४’ को तथ्यांक अनुसार बोइङ ७६७ मोडलको उक्त विमान धावनमार्गबाट बाहिरिँदा प्रतिघण्टा करिब १३० माइलको गतिमा थियो । विमान के कति कारणले रोकिन नसकेको हो भन्नेबारे अनुसन्धान भइरहेको मियामी प्रहरीले जनाएको छ ।