काठमाडौं– राप्रपा सांसद खुश्बु ओलीले विगत ३५ वर्षमा हुन नसकेका कामहरू गरेर उदाहरण दिन सरकारलाई सुझाव दिएकी छन् ।  

शुक्रबार प्रतिनिधिसभा बैठकमा सांसद ओलीले ३५ वर्षसम्म विगतका नेताहरूले के गरे भनेर प्रश्न गर्नुको साटो अब ३५ वर्षमा हुन नसकेका कामहरू गरेर उदाहरण प्रस्तुत गर्न सरकारलाई सुझाव दिएकी हुन् । 

उनले ग्याँस र पेट्रोलको मूल्य वृद्धि भइरहने पुरानै समस्या भएकाले सरकारले समाधानमुखी भएर विद्युतीय चुलोमा लाग्ने भन्सार र विद्युत् महसुल/भ्याट हटाउनुपर्ने उल्लेख गरिन् ।  

सरकारले स्वदेशमै युवाहरूलाई रोक्ने नीति लिने भने पनि देशमै उद्यम गरिरहेका युवाहरूलाई लक्षित गरी राइड सेयरिङ सेवामा करको भार कायम राख्नु विरोधाभासपूर्ण रहेकाले यसलाई हटाउन उनले माग गरिन् । उनले राजदूत चयनको प्रक्रिया पारदर्शी हुनुपर्ने समेत बताइन् । 

सांसद ओलीले सीमा सम्बन्धी प्रधानमन्त्रीको अभिव्यक्ति नसच्याएसम्म संसदमा विरोध जारी रहने स्पष्ट पारिन् ।