काठमाडौं– औषधि व्यवस्था विभागले विभिन्न ६ प्रकारका नयाँ औषधि तथा मिश्रणहरूको गुणस्तर (स्ट्यान्डर्ड) अनुमोदन गरेको छ । 

विभागले सूचना जारी गर्दै औषधि सल्लाहकार समितिको ५८औँ बैठकको सिफारिस र विभागीय निर्णयअनुसार ती औषधिहरूको ‘एनालाटिकल प्रोफाइल’ स्वीकृत गरिएको जनाएको हो ।

विभागका अनुसार अनुमोदित औषधिहरूमा लुरासिडोन एचसीएल ट्याब्लेट, सल्फामेथोक्साजोल र ट्राइमेथोप्रिम पाउडर, मेलोक्सिक्याम र प्यारासिटामोल बोलस, फिनेरिनोन ट्याब्लेट, मेकोबालामिन डिस्पर्सिबल ट्याब्लेट र एल्बेन्डाजोल बोलस रहेका छन् । यी औषधिहरूका लागि सम्बन्धित एनालाटिकल प्रोफाइल नम्बरसमेत तोकिएको छ ।

औषधि सल्लाहकार समितिको मिति २०८२ पुस ३० गते बसेको ५८औँ बैठकले यी औषधिहरूको स्तर निर्धारणका लागि सिफारिस गरेको थियो । सोही आधारमा विभागले मिति २०८२ चैत २२ गते औपचारिक रूपमा स्वीकृति दिएको हो ।

विभागका अनुसार उक्त प्रोफाइल स्वीकृत भएसँगै अब यी औषधिहरूको उत्पादन, आयात तथा गुणस्तर परीक्षण प्रक्रियामा एकरुपता कायम हुनेछ । यसले नेपाली बजारमा उपलब्ध औषधिको प्रभावकारिता र गुणस्तर सुनिश्चित गर्न सहयोग पुग्ने विश्वास विभागको छ ।