काठमाडौं- राष्ट्रिय प्रजातन्त्र पार्टीका वरिष्ठ नेता कमल थापाले प्रतिनिधिसभा निर्वाचनअन्तर्गत काठमाडौं क्षेत्र नम्बर ५ मा मतगणना नसकिँदै आफ्नो हार स्वीकार गरेका छन्।

सामाजिक सञ्जालमार्फत प्रतिक्रिया दिँदै राष्ट्रिय प्रजातन्त्र पार्टीका वरिष्ठ नेता थापाले मतगणना जारी रहे पनि मतान्तर धेरै भएकाले आफूले हार स्वीकार गरेको बताएका हुन्।

उनले विजयोन्मुख राष्ट्रिय स्वतन्त्र पार्टीका उम्मेदवार राष्ट्रिय स्वतन्त्र पार्टीका सस्मित पोखरेललाई बधाई दिएका छन् । उनले देशव्यापी रूपमा अभूतपूर्व जित हासिल गरेकोमा रास्वपालाई पनि शुभकामना दिएका छन्।

थापाले ‘हलो’ चुनाव चिन्हमा मतदान गर्ने सबै मतदाताप्रति कृतज्ञता व्यक्त गर्दै पराजयका बावजुद सशक्त चुनावी अभियान सञ्चालन गर्ने राप्रपा कार्यकर्ता र समर्थकलाई धन्यवाद दिएका छन्।

उनले चुनावी परिणामबाट विचलित नभई आत्मसमीक्षा गरेर पार्टी अघि बढ्नुपर्ने बताए । चुनावी हार–जित स्वाभाविक प्रक्रिया भएको उनले उल्लेख गरेका छन्। नेपाल रहुन्जेल हिन्दू राष्ट्र र राजसंस्थाको महत्व जीवन्त रहने उनले बताए ।