काठमाडौं- संविधानविद् भीमार्जुन आचार्यले अब बन्ने नयाँ सरकारले नेपाललाई भू-राजनीति र हवाई राजनीति दुवैको चपेटाबाट जोगाउनुपर्ने सुझाव दिएका छन् । जारी मतगणनाको पछिल्लो रुझानका बीच शुक्रबार सामाजिक सञ्जालमार्फत आफ्नो धारणा सार्वजनिक गर्दै उनले देशको स्वाधीनता रक्षा नै अहिलेको सबैभन्दा अहम् विषय भएको बताएका हुन् ।

आचार्यले नेपाली कांग्रेस, नेकपा एमाले र पूर्व माओवादीहरूको पतनको मुख्य कारण उनीहरूको अहंकार र फरक मतलाई कदर गर्न नसक्नु रहेको टिप्पणी गरेका छन् । पुराना दलहरूको शासनकालमा आफ्ना बाहेक अरूलाई मान्छे नै नगन्ने प्रवृत्तिले उनीहरूलाई यो अवस्थामा पुर्‍याएको उल्लेख गर्दै उनले नयाँ आउने शक्तिहरूले यसबाट शिक्षा लिनुपर्नेमा जोड दिएका छन् ।

आचार्यले वर्तमान चुनावी परिणामले वैकल्पिक शक्तिको रूपमा राष्ट्रिय स्वतन्त्र पार्टी (रास्वपा) को पक्षमा भारी जनमत आउने निश्चित जस्तै देखिएको विश्लेषण गरेका छन् । हिजोको राज्यसत्ताको खराब स्वभाव र चरित्रका कारण नै जनताले रास्वपालाई रोजेको दाबी गर्दै उनले अब मुलुक र मतदाताले के पाउँछन् भन्ने कुरा सम्बन्धित दलकै व्यवहारमा निर्भर गर्ने स्पष्ट पारेका छन् ।

राज्यका सबै निकाय र संरचनामा पूर्ण सुधार (ओभरहल) को आवश्यकता औंल्याउँदै उनले २०१५ सालको पहिलो आम निर्वाचनमा प्राप्त दुई तिहाइको जनादेश दलको गलत व्यवहारकै कारण व्यवस्था अन्त्यको कारण बनेको इतिहास स्मरण गराएका छन् । उनले नयाँ बन्ने सरकारलाई विगतका गल्ती नदोहोर्‍याउन र देशको सार्वभौमिकता जोगाउन गम्भीर हुन चेतावनी समेत दिएका छन् ।