विराटनगर- मोरङ निर्वाचन क्षेत्र नम्बर ४ मा मतगणनाको औपचारिक प्रक्रिया सुरु भएको छ। मतदान केन्द्रहरुबाट निर्वाचन अधिकृतको कार्यालयमा मतपेटिकाहरू संकलन गरिसकेपछि राजनीतिक दलका प्रतिनिधिहरूको रोहबरमा मतगणना प्रकिया सुरु भएको हो ।

यस क्षेत्रमा विभिन्न स्थापित र उदाउँदा दलहरूबीच रोचक प्रतिस्पर्धा देखिएको छ। नेपाली कांग्रेसका तर्फबाट प्रभावशाली नेता गुरुराज घिमिरे र नेकपा (माओवादी केन्द्र) का तर्फबाट पूर्वमन्त्री अमनलाल मोदी मुख्य प्रतिस्पर्धीका रूपमा रहेका छन्।

त्यसैगरी, राष्ट्रिय स्वतन्त्र पार्टी (रास्वपा) बाट सन्तोष राजवंशी, राष्ट्रिय प्रजातन्त्र पार्टी (राप्रपा) बाट माधवप्रसाद आचार्य र जनता समाजवादी पार्टी (जसपा), नेपालबाट तवरेज अखतर आलम चुनावी मैदानमा उत्रिएका छन्।

अब गणना कार्यलाई तीव्रता दिइने निर्वाचन अधिकृतको कार्यालयले जनाएको छ। मतगणना स्थल बाहिर सुरक्षा व्यवस्थालाई कडा बनाइएको छ ।