काठमाडौं– गृह मन्त्रालयले जिल्ला प्रशासन कार्यालय (सिडिओ)लाई पत्र लेख्दै ऋण असुलीका नाममा ऋणीमाथि गैरकानुनी क्रियाकलाप गर्नेलाई कारबाही गर्न भनेको छ ।

मन्त्रालयले सरकार र राष्ट्र, राष्ट्रियता, धर्म, संस्कृति र नागरिक बचाउ महाअभियानबीच भएको सहमति पत्र कार्यान्वयन गर्न भन्दै सिडिओ कार्यालयलाई पत्राचार गर्दै सो भनेको हो ।

‘ऋण असुलीका लागि यातना दिने, घरबाट जिन्सी सामान उठाएर लैजाने, किस्ता नतिरेसम्म संस्थाका कर्मचारी घरमै बसेर धरपकड, गाली बेइज्जती, दुर्व्यवहार लगायतका गैरकानुनी कार्यहरू गरेमा त्यस्ता कार्यउपर पीडितले जिल्ला प्रशासन कार्यालयमा उजुरी गर्ने र प्रचलित कानुन बमोजिम कारबाही प्रक्रिया अगाडि बढाउने’, भन्दै गृहले सहमति बुँदा नम्बर ८ पत्रमा उल्लेख गरेको छ ।

भदौ १२ गते मन्त्रिपरिषद्को बैठकले द्विपक्षीय सहमति ग्रहण गर्ने  र कार्यान्वयनका लागि सम्बन्धित मन्त्रालयमा पठाउने गरेको निर्णयअनुसार भदौ १८ गते सचिवस्तरीय निर्णय गरेर गृहले पत्राचार गरेको हो ।

सरकार र राष्ट्र, राष्ट्रियता, धर्म, संस्कृति र नागरिक बचाउ महाअभियान, नेपालबीच भदौ ६ गते द्विपक्षीय सहमति भएको थियो ।