काठमाडौँ– संघीय संसद अन्तर्गत रहेका विभिन्न पाँचवटा समितिका बैठक बस्दैछन् । आज अर्थ समिति, महिला तथा सामाजिक मामिला समिति, राज्य व्यवस्था तथा सुशासन समिति, शिक्षा, स्वास्थ्य तथा सूचना प्रविधि समिति र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठक बस्न लागेको हो ।

अर्थ समितिको बैठक बिहान ११ बजे सिंहदरबारमा बस्नेछ । बैठकमा उपसमितिहरुबाट प्रतिवेदन पेस र छलफल गर्ने कार्यसूची रहेको छ । महिला तथा सामाजिक मामिला समितिको बैठक बिहान ११ बजे सिंहदरबारमा बस्नेछ । बैठकमा मुस्लिम आयोगको कामकारबाही तथा प्रगति सम्बन्धमा आयोगका पदाधिकारीहरुसँग छलफल गर्ने तयारी छ । बैठकमा मुस्लिम आयोगका अध्यक्ष र आयोगका सचिवलाई आमन्त्रण गरिएको छ ।

यसैगरी, राज्य व्यवस्था तथा सुशासन समितिको बैठक दिउँसो १ बजे बस्नेछ । बैठकमा राष्ट्रिय सेवा दल विधेयक–२०८३’ उपर सैद्धान्तिक छलफल र अख्तियार दुरुपयोग अनुसन्धान आयोग र कारागार कार्यालयहरुको स्थलगत अनुगमन प्रतिवेदन पेस गर्ने कार्यसूची छ ।

शिक्षा, स्वास्थ्य तथा सूचना प्रविधि समितिको बैठक बिहान १० बजे सुरु हुनेछ । बैठकमा स्वास्थ्य तथा खाद्य स्वच्छता मन्त्रालयको विद्यमान अवस्था, समसामयिक विषय, चुनौती र भावी कार्ययोजनाका सम्बन्धमा छलफल हुनेछ । बैठकमा स्वास्थ्य तथा खाद्य स्वच्छतामन्त्री र मन्त्रालयका सचिवलाई आमन्त्रण गरिएको छ ।

राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठक दिउँसो साढे २ बजे सिंहदरबारमा बस्नेछ । बैठकमा मुलुकको वर्तमान अवस्था र समसामयिक विषयमा छलफल हुनेछ ।