भोजपुर – प्रतिनिधिसभा सदस्य तथा श्रम संस्कृति पार्टीका सांसद धुर्वराज राईविरुद्ध राष्ट्रिय निकुञ्ज तथा वन्यजन्तु संरक्षण ऐनअन्तर्गत कारबाहीको माग गर्दै जिल्ला प्रहरी कार्यालय भोजपुरमा जाहेरी दर्ता गरिएको छ ।

ललितपुरस्थित स्नेहाज केयरका तर्फबाट रुपक कोइरालाले बुधबार जिल्ला प्रहरी कार्यालय भोजपुरमा जाहेरी पेश गर्दै सांसद राईले विगतमा करिब ६ सय बाँदर मारेको सार्वजनिक अभिव्यक्ति दिएको उल्लेख गरेका छन् ।

जाहेरीमा राईले भोजपुरको टेम्केमैयुङ गाउँपालिका–९ का तत्कालीन गाउँपालिका अध्यक्ष रहँदा करिब ६ सय बाँदर मारेको भन्दै सार्वजनिक रूपमा स्वीकार गरेको दाबी गरिएको छ। उक्त अभिव्यक्ति फेसबुकमा सार्वजनिक एक अन्तर्वार्तामार्फत सार्वजनिक भएको उल्लेख गरिएको छ।

जाहेरीकर्ताले सांसद राईको उक्त कार्य राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २६(२) अन्तर्गतको कसुर भएको दाबी गरेका छन्। सो दफाअनुसार अन्य वन्यजन्तु मार्ने वा घाइते बनाउने व्यक्तिलाई एक लाखदेखि पाँच लाख रुपैयाँसम्म जरिवाना, एक वर्षदेखि दश वर्षसम्म कैद वा दुवै सजाय हुन सक्ने व्यवस्था रहेको जाहेरीमा उल्लेख छ।

जाहेरीसँगै भिडियो अन्तर्वार्तालाई प्रमाणका रूपमा पेश गरिएको छ भने घटनाबारे जानकारी राख्ने स्थानीय व्यक्तिहरूसँग समेत बुझ्न माग गरिएको छ। प्रहरीले जाहेरी प्राप्त भएपछि आवश्यक अनुसन्धान प्रक्रिया अघि बढाउने जनाएको छ।