काठमाडौं– विपी राजमार्गअन्तर्गत रोशी गाउँपालिका–७ स्थित लास्कोट र घुमाउनेको बीचमा जवरजस्ती सवारी साधन लैजाने माइक्रोबसका चालकलाई प्रहरीले नियन्त्रणमा लिएको छ ।  

सम्भावित जोखिमलाई मध्यनजर गर्दै नेपाल प्रहरी तथा ट्राफिक प्रहरीबाट खटिएको प्रहरी टोलीले सुरक्षित स्थानमा रोक्दारोक्दै लापरबाहीपूर्ण तरिकाले जोखिमयुक्त स्थानमा सवारी साधन लैजाने माइक्रोबसका चालकलाई प्रहरीले नियन्त्रणमा लिएको हो । उनीहरूमाथि थप अनुसन्धान भइरहेको जिल्ला प्रहरी कार्यालय काभ्रेले जनाएको छ ।

यसअघि सोमबार राती लास्कोट र घुमाउनेको बीचमा फसेका ५ माइक्रोबसका ८९ यात्रुलाई सुरक्षा निकायले उद्धार गरेको थियो ।

बर्सातपछिको बाढीले रोशी क्षेत्रमा विपी राजमार्गमा बनाइएको अस्थायी डाइभर्सन बगाउन थालेपछि सुरक्षा निकायले सोमबार साँझ नै उक्त क्षेत्रमा आवागमन बन्द गराएको थियो । तर केही चालकले भने जबरजस्ती सवारी साधन अघि बढाएका थिए ।

प्रहरीले राजमार्गको अवस्था बुझेर मात्रै यात्रा गर्न सर्वसाधारणलाई अनुरोध गरेको छ ।