काठमाडौं – लुम्बिनी प्रदेश सभाकी एमाले सांसद रेखा शर्मा रिहा भएकी छन् । आइतबार जिल्ला अदालत काठमाडौंले शर्मालाई थुनामै राखिरहन आवश्यक आधार नदेखिएको निष्कर्ष निकाल्दै रिहा गर्न आदेश दिएको हो ।

न्यायाधीश जगत पौडेलको इजलासले यसअघि नै सरकारी वकिलबाट मुद्दा नचलाउने निर्णय भइसकेको विषयलाई मुख्य आधार मानेको छ । अदालतले आफ्नो आदेशमा प्रस्तुत प्रमाणहरूबाट शर्मामाथि लगाइएका ‘बालिकालाई दास बनाएको’ जस्ता गम्भीर आरोप पुष्टि हुने स्पष्ट आधार नदेखिएको उल्लेख गरेको छ।

साथै, पीडित भनिएकी बालिकाको पढाइ नियमित रूपमा चलिरहेको र शर्माले संरक्षकको भूमिका निर्वाह गरेको तथ्य मिसिलबाट देखिएको पनि अदालतले जनाएको छ।

यसअघि महान्यायाधिवक्ताको कार्यालयले २०८२ जेठ १६ गते नै उक्त मुद्दा नचलाउने निर्णय गरिसकेको थियो। तर त्यसपछि काठमाडौँ महानगरपालिकाका प्रमुख बालेन्द्र शाह नेतृत्वको पहलमा शर्मालाई पुनः पक्राउ गरी अनुसन्धान अगाडि बढाइएको थियो। अब अदालतको आदेशसँगै शर्मा थुनामुक्त भएकी छन् र उनीमाथि थप अनुसन्धान भने खुला अवस्थामा अघि बढ्नेछ।