पोखरा- पर्यटन व्यवसायी कर्ण शाक्यले पोखरास्थित वाटरफ्रन्ट होटलको पर्खाल पूर्वसूचनाबिना भत्काइएकोप्रति गहिरो दुःख व्यक्त गरेका छन् । उनले पोखरा महानगरपालिकाको यो कदमलाई ‘न्यायसङ्गत नभएको’ टिप्पणी गरेका छन् ।

शाक्यले उक्त होटल केवल व्यवसाय मात्र नभई विश्वास, सङ्घर्ष र आस्थाको प्रतीक भएको बताएका छन् । “२० वर्षअघि माओवादी आन्दोलनका बेला जब देशबाट तन, मन र धन पलायन भइरहेको थियो, मैले स्वदेशमै पर्यटनमा लाग्ने निर्णय गरेँ,” उनले भने, “मित्र दिवाकर राजकर्णिकार र मैले रैथाने उद्यमीको ‘बुद्ध लज’ सहितको १७ रोपनी जग्गा किनेर अन्तर्राष्ट्रिय स्तरको होटल बनाएका हौँ । यो हाम्रो पसिना र विश्वासको प्रतिफल हो ।”

पर्यटकको चहलपहल हुने सिजनमा होटल पाहुनाले भरिएको बेला बिहानै महानगरपालिकाले डोजर चलाउनु पीडादायी भएको उनले बताए । फेवातालको ६५ मिटर मापदण्ड राष्ट्रिय सरोकारको विषय भएको उल्लेख गर्दै उनले आफ्नो होटलले कुनै नियम उल्लङ्घन नगरेको दाबी गरे ।

उनका अनुसार होटलको लालपुर्जा, नक्सा पास, पर्यटन र उद्योग विभागको अनुमति तथा राष्ट्र बैङ्कको इजाजतपत्र सबै प्रक्रिया पूरा छ । “हामीले जग्गा मिचेका छैनौँ, हरेक वर्ष कर तिरेका छौँ र कुनै बैङ्कको ऋण पनि छैन,” उनले थपे, “होटल सञ्चालनका लागि पालना गर्नुपर्ने सबै नियम मान्दा पनि हामीमाथि कठोर व्यवहार किन ?”

शाक्यले लेकसाइड क्षेत्रमा हजारौँ बस्ती, उद्योग र होटल रहेको उल्लेख गर्दै उचित मुआब्जा दिएर जग्गा अधिग्रहण नगरी संरचना भत्काउनु गलत भएको तर्क गरे । उनले होटलको भवन ६५ मिटरको मापदण्ड बाहिरै रहेको र तीन तलाको मात्र भएको स्पष्ट पारेका छन् ।

फेवातालको इतिहास स्मरण गर्दै उनले राणाकाल र राजा महेन्द्रको समयमा बाँधको उचाइ बढाउँदा तालको स्वरूप परिवर्तन हुँदै आएको बताए । पोखरा जस्तो पर्यटकीय नगरीमा संरक्षणले विकासलाई रोक्न नहुने उनको भनाइ छ । “कोठामा झिँगा आयो भनेर झ्याल बन्द गर्ने होइन, जाली लगाउने हो,” शाक्यले भने, “संरक्षण नीतिले विकासलाई टेवा दिनुपर्छ, रोक्ने होइन ।”