चितवन- चितवनमा अहिलेसम्म शान्तिपूर्ण रुपमा मतदान भइरहँदा केही ठाउँमा निर्वाचन विरोधी गतिविधि भएका छन् ।

चुनाव विरोधी गतिविधि भएपछि प्रहरीले निगरानी बढाउँदै धरपकड गरेको छ । निर्वाचन विरोधी गतिविधि गर्ने तीनजनालाई बिहीबार प्रहरीले पक्राउ गरेको छ ।

भरतपुरको नारायणी नमुना माद्यमिक विद्यालय अगाडि चुनाव बहिष्कारको पम्प्लेटसहित विरोध प्रदर्शन गर्ने क्रममा दुई जनालाई पक्राउ गरिएको प्रमुख जिल्ला अधिकारीले गणेश अर्यालले जानकारी दिए ।

पक्राउ पर्नेमा नेकपा (बहुमत) चितवनका जिल्ला सेक्रेटरी सुमन श्रेष्ठ र अखिल क्रान्तिकारीका जिल्ला संयोजक किरण गौतम छन् ।

यस्तै चितवन क्षेत्र नं. ३ अन्तर्गत माडी नगरपालिकास्थित माडी माध्यमिक विद्यालय मतदानस्थलका एकजना कर्मचारी पनि पक्राउ परेका छन् ।

कार्यालय सहयोगी बुद्धि सागर पौडेलले मतदातालाई प्रभावित पार्ने गरी एक पार्टीको पक्षमा भोट माग्न थालेपछि नियन्त्रणमा लिइएको प्रमुख जिल्ला अधिकारी अर्यालले बताए ।