काठमाडौं- राष्ट्रिय स्वतन्त्र पार्टीका एकजना उम्देवारलाई चुनाव प्रचारमा जुटिरहेका बेला भ्रष्टाचार आरोप आइलागेको छ ।

सप्तरी क्षेत्र नम्बर ३ बाट प्रतिनिधिसभा सदस्यमा उठेका रास्वपा उम्मेदवार अमरकान्त चौधरीलाई भ्रष्टाचार आरोपमा अख्तियारले बयानमा बोलाएको हो । उनीसहित ९ जनालाई अख्तियारले भ्रष्टाचार आरोपमा तान्ने निर्णय गरेको हो ।

उनीसहित तत्कालीन विद्यालय व्यवस्थापन समितिका रामसागर मण्डल, सतेन्द्रकुमार मण्डल, रुञ्चीदेवी सदा, कविता सिंह, श्यामलादेवी मण्डल, दुखरण मण्डल, सुभाषकुमार साह र योगेन्द्रप्रसाद मेहतालाई पनि अख्तियारले बयानमा तानेको छ।

उम्मेदवार चौधरी गाउँकै श्रीकान्त चन्द्र नमुना माध्यमिक विद्यालयका व्यवस्थापन समितिका अध्यक्ष पनि हुन् । उनीसहित नौजनाले विद्यालय भवन बनाउँदा भ्रष्टाचार गरेको उजुरी परेको थियो ।

आयोगले अध्यक्ष चौधरीसहितलाई बयानका लागि पठाइदिन डाक्नेश्वरी नगरपालिकालाई पत्र पठाएको हो । पत्रमा उक्त नगरपालिका ५ मा अवस्थित उक्त विद्यालयका तत्कालीन व्यवस्थापन समितिका अध्यक्ष चौधरीसहितलाई यही शुक्रबार बिहान १० बजे आयोगको अनुसन्धान शाखा नं. ४ (ख) मा उपस्थित गराइदिन उल्लेख गरिएको छ ।

रास्वपा उम्मेदवार अमरकान्त चौधरी पूर्वसांसद चन्द्रकान्त चौधरी पुत्र हुन्। राष्ट्रिय जनता पार्टी (राजपा) मा राजनीति गरिरहेका उनी अहिले रास्वपातिर लागेर सांसदको दौडमा थिए ।