काठमाडौं – केही जेन-जी युवाहरूले जेन-जी आन्दोलनमा भएका घटनालाई लिएर पक्राउ गरेका युवाहरूलाई रिहा नगरे आन्दोलन गर्ने चेतावनी दिएका छन् ।

आइतबार काठमाडौंमा पत्रकार सम्मेलन गर्दै उनीहरूले जेन-जी आन्दोलनमा भएका घटनालाई लिएर हजारभन्दा बढी युवाहरूलाई गिरफ्तार गरिएको भन्दै उनीहरूलाई रिहा नगरे आन्दोलन गर्ने चेतावनी दिएका हुन् ।

देशको परिवर्तनका लागि लडेका युवाहरू अहिले जेलमा बस्न बाध्य भएको र देशलाई बर्बाद पार्नेहरू खुलेआम हिँडिरहेको उनीहरूले बताएका छन् ।

पत्रकार सम्मेलनमा जेन-जी मुभमेन्ट नेपालका अजय सोडारीले जेन-जी आन्दोलनले बलिदान गरेपनि वर्तमान सरकार जेन-जीको हुन नसकेको बताए । सडकमा आएर परिवर्तनका लागि लडेका हजारौँ युवाहरूलाई वर्तमान सरकारले थुन्ने काम गरेको भन्दै उनले आपत्ति जनाए ।

उनले वर्तमान सरकार जेन-जीको भावनाबिपरित अघि बढेको भन्दै प्रधानमन्त्रीको राजीनामा समेत माग गरे ।

जेन-जीको भावना अनुसार नयाँ सरकार गठन गर्नका लागि दवाव दिन केहिदिनमा आन्दोलन गर्ने भन्दै उनले निष्कर्ष ननिस्केसम्म पछि नहट्ने बताए ।