काठमाडौं- ललितपुरको ताल्छिखेलस्थित गोरखा सेभिङ एन्ड क्रेडिट को-अपरेटिभ लिमिटेडका अध्यक्ष मानसिंह राईसहित ४ जना सञ्चालक पक्राउ परेका छन् ।

समस्याग्रस्त घोषित उक्त सहकारीका तत्कालीन अध्यक्ष राईसहित चारजना सञ्चालकलाई बचत अपचलन गरेको आरोपमा पक्राउ गरिएको जिल्ला प्रहरी परिसर ललितपुरका एसएसपी होबिन्द्र बोगटीले बताए ।

तीन हजार १०० भन्दा बढी बचतकर्ताको करिब ४ अर्ब रुपैयाँ अपचलन गरेको जाहेरीका आधारमा उनीहरूलाई पक्राउ गरिएको बोगटीले जानकारी दिए ।

पक्राउ पर्नेमा सहकारीका अध्यक्ष मानसिंह राई, प्रमुख कार्यकारी अधिकृत लालबहादुर क्षेत्री, सञ्चालकहरू कर्णबहादुर राई र अनलिकुमार राई छन् ।

गोरखा सेभिङ एण्ड क्रेडिट को-अपरेटिभका तीन हजार १०२ जना बचतकर्ताको तीन अर्ब ८९ करोड ७२ लाख ६७ हजारभन्दा बढी रकम अपचलन भएको भन्दै जाहेरी आएको बोगटीले बताए ।

यसअघि नै सरकारले यस सहकारीलाई समस्याग्रस्त घोषणा गरी सम्पत्ति तथा दायित्त्व फर्स्यौटका लागि समस्याग्रस्त सहकारी व्यवस्थापन समितिमा पठाइसकेको छ।

यस सहकारीलाई २०८१ असार ६ गते समस्याग्रस्त घोषणा गरिएको थियो । समितिमा २५ सय ९४ मा बचकर्ताले तीन अर्ब २३ करोड ४८ लाख ४५ हजार रुपैयाँ मागदाबीसहित उजुरी दिएका छन् ।