काठमाडौं– राष्ट्रिय स्वतन्त्र पार्टी(रास्वपा)का सभापति रवि लामिछानेले संसद्‍मा लोकतान्त्रिक प्रणालीलाई प्रहार हुने किसिमको व्यवहार नहुने बताएका छन् । 

शुक्रबार सिंहदरबारमा सञ्चारकर्मीसँग कुरा गर्दै लामिछानेले संसद्‍मा प्रतिपक्षीलाई दमन गर्ने, नागरिकको मुद्दाहरूलाई बन्देज गर्ने जस्ता लोकतान्त्रिक प्रणालीलाई प्रहार हुने किसिमको व्यवहार नहुने बताएका हुन् । 

संसदीय मर्यादा, संसदीय नियमावलीका अनुशासनको मापदण्डको पूर्णरुपमा पालना हुने उनको भनाइ छ । उनले रास्वपा उपसभापति डीपी अर्याले सभामुख भइसकेपछि पार्टीभन्दा पनि सदनप्रति उत्तरदायी हुने विश्वास व्यक्त गरे । 

सभापति लामिछानेले उपसभापतिका विषयमा भने अहिले कुनै पार्टीसँग छलफल नभएको जानकारी दिए । उनले न्याय पाउने पहिलो हक जेन-जी आन्दोलनका शहीद परिवारलाई रहेको भन्दै पछिल्लो घटनाक्रमलाई राजनीतिक प्रतिशोध भन्न नमिल्ने बताए । 

रास्वपा नेतृत्वको सरकारको गतिविधि पब्लिक अडिटमा रहेकाले सबै गतिविधिहरू पारदर्शी हुने उनको भनाइ छ ।  

उनले रास्वपालाई जनताले दिएको म्याण्डेड अनुसार नीतिगत रुपमा नै बोलेर भन्दा काम गरेर सुधारका अभिभाराहरूलाई पुरा गर्ने धारणा राखे ।