काठमाडौं– नवौँ अन्तर्राष्ट्रिय महिला उद्यमी व्यापार मेला शुक्रबारबाट ललितपुरमा सुरु भएको छ ।

महिला उद्यमशीलता प्रवर्द्धनको उद्देश्यका साथ महिला उद्यमी महासङ्घ नेपालद्वारा आयोजना सुरु मेला तीन दिनसम्म चल्ने छ ।

मेलाको उपराष्ट्रपति रामसहाय प्रसाद यादवले उद्घाटन गरे । सो क्रममा उपराष्ट्रपति यादवले महिला उद्यमशीलताको माध्यमबाट रोजगारीको सिर्जनाका साथै व्यक्ति, परिवार, समाज र समग्र राष्ट्रिय अर्थतन्त्रको सुधार गर्न सहयोग पुग्ने बताए । महिला उद्यमशीलताको प्रवर्द्धनका लागि सम्बन्धित सबै सरोकारवालाहरूको ध्यान जान जरुरी रहेको उनको भनाइ छ ।

महासंघका अध्यक्ष दर्शना श्रेष्ठले मेलामा सातै प्रदेशका महिला उद्यमीहरूले आफ्ना मौलिक उत्पादनहरू प्रदर्शनको व्यवस्था गरिएको बताइन् । 

प्रदर्शनीमा हस्तकला, ढाका, गलैँचा, हातेकागज, जैविक खाद्यपदार्थ, जडीबुटी, कृषिजन्य उत्पादन, गरगहना तथा सेवा क्षेत्रसँग सम्बन्धित सामग्री राखिएको छ । मेलामा करिब रु दुई करोड बराबरको कारोबार हुने आयोजकको अपेक्षा रहेको छ ।