काठमाडौं– बाढीपीडितका लागि भन्दै प्रधानमन्त्री दैवी प्रकोप उद्धार कोषमा रकम जम्मा गरिदिने बहानामा विभिन्न व्यक्तिलाई आफ्नो बैंक खातामा रकम जम्मा गर्न लगाएको आरोपमा प्रहरीले एक जनालाई नियन्त्रणमा लिएको छ।

जिल्ला प्रहरी परिसर काठमाडौंका अनुसार भोटेकोशी नदीमा आएको बाढीका कारण सिन्धुपाल्चोक, नुवाकोटलगायतका जिल्लामा धनजनको क्षति भएको घटनालाई आधार बनाएर कृष्ण केसीले विभिन्न व्यक्तिबाट रकम संकलन गरिरहेको सूचना प्राप्त भएको थियो।

सूचनाका आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले काठमाडौं-१४ कलंकीबाट चन्द्रागिरि नगरपालिका–१ निवासी ४६ वर्षीय कृष्ण केसीलाई नियन्त्रणमा लिएको हो।

प्रहरीका अनुसार केसीले बाढीपीडितका लागि सहयोग रकम संकलन गर्ने भन्दै क्यूआर कोडमार्फत आफ्नो बैंक खातामा रकम जम्मा गर्न लगाएको पाइएको छ।

नियन्त्रणमा लिइएका केसीमाथि आवश्यक अनुसन्धान भइरहेको प्रहरीले जनाएको छ।