रसुवा– भोटेकोशी बाढीले प्रभावित ठाउँमध्ये एक हो-स्याफ्रुवेंशी । यहाँका अधिकांश घर र होटल बगाएर निकै ठूलो भौतिक क्षति पुगेको छ ।

धुन्चेदेखि करिब ५ किलोमिटरसम्म सडकको पहुँच रहेपनि त्यसपछिको बजार स्याफ्रुवेंशी पुग्न सहज छैन । त्रिशूलीले पासाङ ल्हामु राजमार्ग क्षतविक्षत बनाएको छ ।

सडक सम्बन्ध टुटेका कारण प्रभावित क्षेत्रमा राहत, उद्धार तथा खोजी कार्यमा समेत कठिनाइ भइरहेको छ ।

स्थानीयवासी तथा आफन्तहरूले आफ्ना परिवारका सदस्य सम्पर्कविहीन रहेको बताइरहेका छन् । दिन बित्दै जाँदा हराएकाहरू जीवित भेटिने आशमात्र मरेको छैन, शव पनि नभेटिने चिन्ता देखिन्छ ।

रसुवास्थित श्री श्रीनाथ गणका सहायक रथी उज्ज्वलविक्रम राणाका अनुसार बाढी आएको दिनदेखि नै नेपाली सेना, सशस्त्र प्रहरी बल र नेपाल प्रहरीका सुरक्षाकर्मी प्रभावित क्षेत्रमा उद्धार, राहत तथा खोजी कार्यमा निरन्तर खटिएका छन् ।

सुरक्षा संयन्त्रले स्याफ्रुवेंशीलगायत प्रभावित क्षेत्रमा अझै पनि खोजी तथा उद्धार कार्यलाई निरन्तरता दिइरहेको छ । बाढीले पुर्‍याएको क्षतिको पूर्ण विवरण संकलन तथा बेपत्ताको खोजी कार्य जारी छ ।

तस्बिर : प्रविण रानाभाट/नेपाल फोटो लाइब्रेरी