काठमाडौं – राष्ट्रिय स्वतन्त्र पार्टी (रास्वपा)ले आफ्नो आधिकारिक सामाजिक सञ्जालमार्फत पहिलो महाधिवेशनबाट निर्वाचित केन्द्रीय सदस्य तथा पदाधिकारीहरूको तस्बिर क्रमशः सार्वजनिक गरिरहेको छ।

पार्टीले निर्वाचित ९९ जना केन्द्रीय सदस्यका तस्बिर एकएक गरी बधाई सन्देशसहित सार्वजनिक गरिरहेको हो। यससँगै पदाधिकारीमा निर्वाचित नेताहरूको तस्बिर पनि क्रमिक रूपमा सार्वजनिक भइरहेको पार्टीको प्रचारप्रसार विभागले जनाएको छ।

रास्वपाको पहिलो महाधिवेशन असार ७ देखि १२ गतेसम्म चितवनमा सम्पन्न भएको थियो। महाधिवेशनबाट नयाँ केन्द्रीय समिति र पदाधिकारी चयन भएका थिए।

सामाजिक सञ्जाललाई प्राथमिक माध्यमका रूपमा प्रयोग गर्दै आएको रास्वपाले पार्टीका गतिविधि, निर्णय तथा नेतृत्वसँग सम्बन्धित जानकारी नियमित रूपमा सार्वजनिक गर्दै आएको छ। महाधिवेशनबाट निर्वाचित नेतृत्वलाई बधाई दिँदै सामाजिक सञ्जालमार्फत परिचय गराउने अभियान पनि त्यसैको निरन्तरता भएको पार्टीले जनाएको छ।