काठमाडौं– प्रधानमन्त्री वालेन्द्र शाहको अध्यक्षतामा मंगलबार बसेको मन्त्रिपरिषद् बैठकले विभिन्न चार महत्वपूर्ण निर्णय गरेको छ।

बैठकले संयुक्त राष्ट्रसंघीय वातावरण कार्यक्रम (युएनईपी) अन्तर्गत ओजोन तहलाई हानि पुर्‍याउने पदार्थको व्यवस्थापन तथा न्यूनीकरणसम्बन्धी ‘मोन्ट्रियल प्रोटोकल’ कार्यान्वयनसँग सम्बन्धित सम्झौता स्वीकृत गर्ने निर्णय गरेको छ।

यस्तै, सशस्त्र प्रहरी बल नेपालका नायव महानिरीक्षक (डीआईजी) अञ्जनीकुमार पोखरेललाई सशस्त्र प्रहरी अतिरिक्त महानिरीक्षक (एआईजी) पदमा बढुवा गर्ने निर्णय पनि गरिएको छ।

मन्त्रिपरिषद्ले २०८२ साल भदौ २३ र २४ गतेको प्रदर्शनका क्रममा भएका घटनाको छानबिन गर्न गठित आयोगले पेश गरेको प्रतिवेदनमा उल्लेखित सुरक्षा संयन्त्रसम्बन्धी विषय अध्ययन गरी सिफारिस गर्न बनेको अध्ययन समितिको कार्यावधि ४५ दिन थप गर्ने निर्णय गरेको छ।

त्यसैगरी, भूमि व्यवस्था, सहकारी तथा सङ्घीय मामिला एवम् सामान्य प्रशासन मन्त्रालयअन्तर्गत भूमि समस्या समाधान समितिको अध्यक्षमा कास्कीका बलभद्र वास्तोलालाई नियुक्त गरिएको छ।

समितिका सदस्यमा काठमाडौंका अमिरप्रसाद न्यौपाने, लमजुङकी पद्मिनी सोती र काठमाडौंकी डा. रेहना श्रेष्ठलाई नियुक्त गर्ने निर्णय मन्त्रिपरिषद्ले गरेको छ।

सरकारले यी निर्णयमार्फत् वातावरण संरक्षण, सुरक्षा निकायको व्यवस्थापन तथा भूमि समस्या समाधानका कार्यलाई अघि बढाउने जनाएको छ।