काठमाडौँ – प्रतिनिधि सभा सदस्य तथा राष्ट्रिय आविष्कार केन्द्रका संस्थापक महावीर पुनले आफ्ना परियोजनाहरू सञ्चालनका लागि आर्थिक स्रोत जुटाउन किताब बेचिरहेको बताएका छन् । सांसद हुँदा र नहुँदा पनि आफूले किताब बेचिरहनुको पछाडि बाध्यता रहेको उनले स्पष्ट पारेका छन् ।

पुनका अनुसार हाल राष्ट्रिय आविष्कार केन्द्र, पोखरा आइसीटी इनोभेसन ल्याब र वीरगन्ज कृषि औजार कारखाना गरी तीनवटा क्षेत्रमा ठुलो जनशक्ति कार्यरत छ । जसमा आविष्कार केन्द्र र पोखरा ल्याबमा ३८ जना तथा वीरगन्जमा ४५ जना गरी कुल ८३ जना युवाले प्रत्यक्ष काम गरिरहेका छन् । यसबाहेक १० देखि १५ जनाले इन्टर्नसीप गरिरहेका छन् ।

मासिक २५ लाख रुपैयाँ पारिश्रमिकमै खर्च
उनले करिब ९० जनाको दैनिक खानपिन र पूर्णकालीन कर्मचारीको पारिश्रमिकमा मात्रै मासिक २५ लाख रुपैयाँ खर्च हुने जानकारी दिए । अनुसन्धान र नवप्रवर्तनका लागि आवश्यक मेसिनरी तथा कच्चा पदार्थ खरिदमा पनि ठुलो रकम खर्च हुने उनको भनाइ छ ।

‘आम जनताले दान गरेको पैसाले मात्र पुग्दैन, त्यसैले बाध्य भएर किताब बेचेको हुँ’, पुनले भनेका छन् । उहाँले आफ्नो अवस्थालाई हिन्दी उखान ‘मर्ता क्या नही कर्ता’ सँग तुलना गर्दै काम गर्ने आँट नभई मुख मात्र चलाउनेलाई समेत चुनौती दिनुभएको छ ।