सल्यान– राष्ट्रिय स्वतन्त्र पार्टी, बन्गाड कुपिण्डे नगर समितिले चुनाव प्रचारमा प्रयोग भएको गाडीमा राखिएको मदिराको कार्टुन र चामल अर्कैको भएको जवाफ दिएको छ।

सामाजिक भ्रम फैलिएको भन्दै रास्वपाले भ्रम छरिएको बताएको छ। ‘नयाँ पार्टीको प्रचार–प्रसारका लागि सल्ली बजारमा रक्सी र चामलसहित गाडी हिँडाएको’ भन्ने विषय भ्रमपूर्ण र आधारहीन रहेको छ’, रास्वपाले भनेको छ।

विज्ञप्तिमा पार्टीको उत्पत्ति सामान्य सोच र विचारबाट नभई देशमा गलत अभ्यास परिवर्तन गरेर सही अभ्यासतर्फ अगाडि बढाउने उद्देश्यले भएको जिकिर गरिएको छ। पार्टीले देशमा शासन गरिरहेका कतिपय पार्टीका व्यक्तिगत स्वार्थले यस्तो भ्रामक समाचार फैलाएको जिकिर गरेको छ।

सोमबार चुनाव प्रचारमा लगिएको गाडीमा रहेको मदिरा र चामलजन्य सामग्री पार्टीको नभएको जिकिर सभापति लोकेन्द्र ओलीले गरेका छन् ।

उक्त सामग्री ढुवानी पार्टीको पहल वा संलग्नतामा नभई गाडीको साहुले व्यक्तिगत वा स्थानीय व्यवसायीको सहयोगार्थ मात्र ढुवानी गरेको उनले बताए । पार्टीले प्रशासनसँग सहकार्य गर्दै घटनाको वास्तविकता छानबिन गर्न तयार रहेको समेत जनाएको छ।