काठमाडौं– नेकपा एमालेनिकट राष्ट्रिय युवा संघ नेपालले अध्यक्ष महाराजा गुरुङको नेतृत्वमा निर्वाचन परिचालन कमाण्ड गठन गरेको छ।

संघको केन्द्रीय युवा परिषद्को पहिलो बैठक यही शुक्रबार राष्ट्रिय सभागृह, काठमाडौंमा बसेर यो निर्णय गरेको हो ।

बैठकले वर्तमान राजनीतिक परिस्थितिको वस्तुगत विश्लेषण गर्दै आगामी प्रतिनिधिसभा निर्वाचनमा संगठन सक्रिय भूमिका निर्वाह गर्ने निर्णय गरेको छ।

यस बैठकले नेपाली युवा आन्दोलनलाई नयाँ गति प्रदान गर्ने र समृद्ध नेपाल निर्माणको उद्देश्यसहित संगठनका अध्यक्ष माहाराज गुरुङको नेतृत्वमा निर्वाचन परिचालन कमाण्ड गठन गरेको छ।

केन्द्रस्तरीय कमाण्डमा ५०१ सदस्यीय छ । १६५ निर्वाचन क्षेत्रमा पृथक परिचालन कमाण्ड बनाइएको छ। प्रत्येक वडामा वडा कमाण्डर (६७४३) र प्रत्येक बुथमा बुथ कमाण्डर (१०९६७) तोकिएको छ।

निर्वाचन परिचालन कमाण्डले उम्मेदवारको प्रचारप्रसार, मतदातामा जागरण र मतदानका लागि भयरहित वातावरण सुनिश्चित गर्ने जिम्मेवारी पाउने छ ।

संगठनका निवर्तमान अध्यक्ष क्षितिज थेवेको नेतृत्व हस्तान्तरण गर्दै बैठकले माहाराज गुरुङलाई नयाँ अध्यक्षमा चयन गरेको थियो ।

बैठकले राजनीतिक रूपमा प्रशिक्षित, वैचारिक रूपमा सुस्पष्ट र सांगठनिक रूपमा चुस्त संगठन निर्माणका लागि महत्वपूर्ण निर्णय गरेको बताइएको छ।