काठमाडौं – समाज कल्याण परिषद्ले भक्तीमण्डप क्षेत्रस्थित स्टल नं. ७ मा रहेका नेपाल पत्रकार महासंघ काठमाडौं जिल्ला शाखालाई बक्यौता रकम तत्काल बुझाउन निर्देशन दिएको छ ।

परिषद् अन्तर्गतको भक्तीमण्डप व्यवस्थापन विभागले पत्राचार गर्दै लामो समयदेखि स्टल प्रयोग गरेबापतको बक्यौता रकम नबुझाइएको जनाएको हो ।

पत्रमा उल्लेख भएअनुसार पटक–पटक मौखिक तथा गोरखापत्र राष्ट्रिय दैनिकमार्फत सार्वजनिक सूचना प्रकाशित गरी जानकारी गराउँदा पनि बक्यौता रकम बुझाइएको छैन । यसअघि ७ दिनभित्र २०८२ पुष मसान्तसम्म बक्यौता रकम बुझाउन आग्रह गरिए पनि सो अनुरूप रकम दाखिला नभएको परिषद्को भनाइ छ ।

समाज कल्याण परिषद्ले पत्र प्राप्त भएको मितिले ७ दिनभित्र रु। ५,१५,९५१ बक्यौता रकम बुझाउन आग्रह गर्दै अन्यथा प्रचलित कानुनबमोजिम कारबाही प्रक्रिया अघि बढाइने चेतावनी दिएको छ । परिषद्ले बक्यौता नतिरेमा स्टलमा बस्न नपाइने र त्यसबाट पर्ने सम्पूर्ण असरको जिम्मेवारी सम्बन्धित संस्थाकै हुने स्पष्ट पारेको छ ।

उक्त पत्र महिला, बालबालिका तथा ज्येष्ठ नागरिक मन्त्रालय, जिल्ला प्रशासन कार्यालय काठमाडौं, प्रहरी वृत्त सिंहदरबार तथा समाज कल्याण परिषद् पुल्चोक, ललितपुरलाई समेत बोधार्थ पठाइएको छ ।