काठमाडौं– नेपाली कांग्रेसका महामन्त्री विश्वप्रकाश शर्माले विशेष महाधिवेशनले पार्टीलाई विभाजन होइन, एकताबद्ध गर्दै नयाँ नेतृत्वतर्फ लैजाने स्पष्ट पारेका छन् । विशेष महाधिवेशनका कारण कांग्रेस फुट्ने आशंका निराधार भएको उनको भनाइ छ ।

पुस २६ गतेदेखि हुने गरी गत मंसिर १५ गते तय गरिएको १५औँ महाधिवेशन निर्धारित समयमा हुन नसक्ने भएपछि कांग्रेसभित्र विवाद चुलिएको छ । यही सन्दर्भमा महामन्त्रीद्वय गगन थापा र विश्वप्रकाश शर्माले नियमित महाधिवेशन स्थगित गर्दै विशेष महाधिवेशनको घोषणा गरेका थिए ।

यसै विषयमा छलफल गर्न ललितपुरको सानेपास्थित पार्टी कार्यालयमा केन्द्रीय कार्यसम्पादन समिति बैठक बस्दैछ । बैठकमा समसामयिक राजनीतिक अवस्था, सरकारको कार्यसम्पादन, पार्टीको आन्तरिक संगठन र आगामी रणनीतिबारे छलफल हुने बताइएको छ ।

बैठकमा सहभागी हुन जाने क्रममा पार्टी कार्यालयमा सञ्चारकर्मीसँग कुरा गर्दै महामन्त्री शर्माेले कांग्रेसले विगतमा सशस्त्र विद्रोहजस्ता जटिल विषयहरू समेत समाधान गरेको स्मरण गराए । ‘विधानको व्यवस्थाअनुसार अघि बढ्दा कांग्रेस फुट्दैन, एक ढिक्का भएर अघि बढ्छ,’ उनले भने ।

देशभरबाट पार्टी फुट्ने चिन्ता व्यक्त गर्दै फोन आएको उल्लेख गर्दै शर्माले अहिलेको परिस्थितिमा नयाँ नेतृत्व र नयाँ नीतिसहित अघि बढ्नु आवश्यक रहेको बताए । ‘मिति मात्रैका कारण नियमित महाधिवेशन रोकिएको हो । त्यसको विकल्पका रूपमा विशेष महाधिवेशन प्रस्ताव गरिएको हो,’ उनले स्पष्ट पारे ।

विशेष महाधिवेशनको कार्यतालिका पनि शर्माले सार्वजनिक गरे । उनका अनुसार पुस २६ गते एक घण्टा उद्घाटन सत्र हुनेछ । त्यसपछि सुशासन, समसामयिक राजनीति र जेन–जीसँग सम्बन्धित एजेन्डा पारित गरिनेछ । सोही दिन दिउँसो २ बजेदेखि ४ बजेसम्म उम्मेदवारी दर्ता हुने र भोलिपल्ट बिहानदेखि मध्याह्नसम्म नयाँ नेतृत्व चयन गरिने योजना छ ।

‘पार्टी फुटाउने कुनै एजेन्डा छैन,’ शर्माले भने, ‘कांग्रेस एक ठाउँमा उभिनका लागि पनि विशेष महाधिवेशन आवश्यक छ ।’

कुनै हालतमा नेपाली कांग्रेस विभाजित नहुने दाबी गर्दै उनले सद्भाव, सुशासन र समुन्नतिको यात्रामा अघि बढ्न कांग्रेस प्रतिबद्ध रहेको बताए ।