काठमाडौं- नेपालले भारतीय भूमि मिचेको भनेर गम्भीर अभिव्यक्ति दिएसँगै प्रधानमन्त्री वालेन्द्र शाह अर्को विवादमा परेका छन् ।

आइतबार अचानक संसद् भवनमा छिरेका उनले हात उठाउँदै सभामुख डोलप्रसाद अर्यालसँग समय मागेर बोलेका थिए।

त्यसक्रममा उनले प्रतिपक्षी दलका सांसदहरूका प्रश्नको जवाफ दिँदै नेपालले पनि भारतको भूमि मिचेको विवादित भनाइ दिएका थिए।

उक्त भनाइपछि सामाजिक सञ्जालदेखि प्रतिपक्षी दलहरू पनि भड्किएका छन् । सोमबार बसेको संसद् बैठकमा प्रतिपक्षी दलहरू एक मत भएर सरकारालई घेराउ गरेका छन् ।

सुरूबाटै विरोधमा उत्रिएका प्रतिपक्षी सांसदहरूले नाराबाजी गरिरहेका छन् । विरोधका बीच सभामुख अर्यालले बोल्ने समय प्रतिपक्षीलाई दिए ।

प्रतिपक्षीका तर्फबाट बोल्दै नेकपा एमालेका प्रमुख सचेतक ऐन महरले प्रधानमन्त्री वालेन्द्रले लगातार संसद्को अपमान गरिरहेको बताए ।

उनले वालेन्द्रको भनाइप्रति आपत्ति जनाउँदै पोशाकप्रति पनि आपत्ति प्रकट गरे । ‘प्रधानमन्त्री वालेन्द्र सेनाकहाँ जाँदा दौरासुरुवालमा सजिन्छन् । तर उनै सदनमा भने फुटबल खेल्ने पोशाक लगाएर आउँछन्। यो संसद्लाई फेशन शो गर्ने थलो बनाइएको छ।’

उनले वालेन्द्रबाट संसद्मा राखिएको भनाइ रेकर्डबाट हटाउनुका साथै सार्वजनिक रुपमा माफी माग्नुपर्ने पनि बताएका छन् ।